捍衛廣東話和繁體字，成為了近年關注保育香港文化的議題，William也是其中有心人。
William於21年1月在Apple及Google流動平台開發的讀書App「點點閱」（Dot Dot Read），以書籍撮要和語音旁述，讓讀者每日只需十五分鐘「聽書」，便能理解書本重點。「個App嘅撮要都係用繁體字嘅語體文撰寫，語音就用番廣東話嚟錄——我係香港人，繁體字同廣東語係我嘅情意結，我好想保育。」
18年起，William開始自資籌備這個App，選擇上架書籍、撰寫書本撮要文章、錄製語音，工序繁複，卻事事親力親為，希望能達到自己滿意的效果，才讓經過一番精雕細琢的「點點閱」正式面世。「成個過程好癲！行過好多『冤枉路』，但學到好多嘢！我想藉住呢個App，培養到大家閱讀嘅風氣。」
曾從事金融界，以及在蘋果電腦公司工作過的William，去年1月創立的讀書App「點點閱」（Dot Dot Read），至今已有數百本書籍上架，清單由實用的管理學、市場學到輕鬆的家務整理都有， 藉著每本書的撮要，配以語音旁述，讓用家只需大約十五分鐘，便能理解一本書的重點內容。
「我整呢個App嘅mission係想推廣閱讀風氣，用戶登記做會員後，就算只係做free member其實都好夠用，我哋都會根據你填寫嘅喜好，每日免費送一份撮要俾你睇同聽。對於一啲唔係好鍾意用十個、八個鐘睇一本書嘅人嚟講，每日用十五分鐘係一個易『入口』嘅選擇，你只要兩、三個禮拜就會自然咁養成閱讀習慣，甚至會開始對其他書好奇，想睇更多、聽更多，減少咗對睇書呢件事嘅抗拒感——呢啲都係我曾經喺另一個英文讀書App體驗過。」
「假如你睇完每日免費摘要覺得唔夠喉，想自由選擇我哋書庫內其他書，先至要俾錢。而收費都只係每月三十幾蚊，即係只要以大約三份之一本書嘅價錢，就可以買到隨時隨地享用到各種書籍嘅『只講重點』閱讀報告，而且仲有人讀埋俾你聽，真心抵。」
「點點閱」這個App，William由18年開始籌備，由於工序繁複，過程不乏沮喪。「本來有另一個partner一齊搞，但真係開檔、真金白銀拎錢出嚟時，佢突然話唔搞。」
結果William只能自資，one man band由揀選上架書籍開始，事事親力親為。「我係有少少偏心去揀自己鍾意嘅書，例如leadership、marketing、心理學，自己會落埋手寫撮要。要親身做得多，先會磨練到寫撮要嘅特定技巧，對我𠵱家培養撮要寫手好有幫助。
「19年後，社運加上疫情，我見有啲人唔方便露面，要在家工作，我就經『良心平台』搵人幫手寫呢啲閱讀報告，佢哋自己揀選鍾意嘅書去寫——當然之前要propose俾我知，一來唔使double effort；二來我可以衡量吓啲書係咪做到撮要，例如一啲教人煮食、打六通拳嘅書，又或者啲專欄結集成嘅書，都好難做呢種撮要。」
以繁體字的書面語來撰寫撮要，又以口語化廣東話作為旁述，是William的情意結。「我係香港人，繁體字同廣東話都係我一種執著，我想保育佢哋。」
雖則是母語，但他在籌備期間，錄製旁述也曾幾經轉折。「之前份工搞到我把聲沙到朋友都唔認得，我自己錄極都唔滿意；後來社運時識咗個開studio嘅朋友幫我，佢介紹咗個歌手俾我，而我就再搵啲靚聲底嘅朋友幫手錄，但當時錄一份摘要，單係做粵語稿就要一兩個鐘，錄音又要兩三個鐘，後製又加一兩個鐘，始終唔係好有效率。結果我喺網上公開求救，有人就介紹咗電台DJ、做開配音嘅人俾我，另外仲有一個之前喺《蘋果動新聞》做嘅人幫手。佢哋好專業，好快手，每人每日可以做幾篇，而家反而係我冇時間派稿俾佢哋錄音。因為我覺得早期嘅撮要做得冇𠵱家嘅咁好，我想改好啲先錄音。𠵱家未錄音嘅書目，暫時會用系統發聲，係權宜之計。」
「其實我曾經試過用AI嘅聲去錄，成本係平好多，但係廣東話嘅AI聲，我覺得100分嘅話，只係得6、70分，而且要從書面語改成口語化文字俾AI去讀都要用唔少時間，咁不如將資源用喺支持廣東話嘅專業人士身上。」
William現已移居台灣，正努力預備拓當地市場。「因為我堅持用繁體字，所以我由 day one 開始，已經預咗有一日會去台灣。而過去兩年香港發生嘅事，加速咗我呢個進程。我哋已經錄製緊台灣國語嘅旁述，好在國語AI嘅聲都做得還好，我哋可以用得着。𠵱家只等 programmer 搞掂用戶介面，俾用戶可以選擇廣東話定係國語，我哋就可以開始喺台灣開始做推廣。」
除了保育繁體字和廣東話，另一個推動他開設「點點閱」的原因，是廿多年前一樁軼事。William 畢業後第一份工作是保險營業員，「有日，其中一個經理串串槓咁攞住本英文書《The 7 Habits of Highly Effective People》（中文版：《與成功有約》）同我哋班𡃁講：『你哋班人冇嚟長進！我就唔同呢，有時間就會睇吓書。嗱！我呢本書係好嘢嚟，但係我睇死你哋唔會肯花時間睇！』當時我有啲唔順氣，到𠵱家仲好記得呢個畫面、佢嘅表情，哈哈！」
最終，有沒有為了不被那個經理睇死，看那本《The 7 Habits》呢？「我當日就去咗書局搵呢本書嚟睇，但係結果我真係俾佢睇死咗！哈哈哈！因為本書成吋厚，當時我唔係好想揭……哈哈哈！」他尷尬地笑著說。「但係呢件事就成為咗我一個多年未解嘅心結。」
「幾年前，我發現咗個英文做書本摘要嘅App，第一時間就去搵呢本書，我睇完之後，感覺多年心結被解開咗！之後我繼續用呢個App睇咗同聽咗好多管理、市場、人物傳記嘅書，慢慢我發覺自己睇嘢嘅角度多咗，冇咁執著。睇原著需要多啲耐性，而睇撮要就可以好快咁滿足到我嘅好奇心，間接鼓勵我對睇書嘅興趣。我介紹呢個英文App俾我當時喺Apple嘅同事，佢哋都話好，但同樣會問：有冇中文呀？就係咁啟發咗我搞『點點閱』。」
William為「良心平台」用戶推薦職涯規劃好書：
1.《我的人生就是我的事業》：提供有系統而實用嘅職涯規劃建議。 https://dotdotread.com/book-summary/fdd0093d-fc3e-4053-a26b-8646fbde4197
2.《在AI時代勝出》：內容主要指導喺職場環境裏面，點樣建立起你嘅個人品牌。 https://dotdotread.com/book-summary/f86c9bd9-7939-408a-b868-0b50dfe7644b
3.《斜槓青年》：點樣成功成為Slash嘅手冊。 https://dotdotread.com/book-summary/24b17742-af74-44dd-9c53-5a1ad2c4d2b3
----------
現凡透過以下連結以HK$358 訂購1年尊尚會籍，點點閱將額外送出同值HK$358尊尚會籍，給予經濟有困難的年青人。立即行動，讓受惠者與你一起為人生增值！即上了解更多： https://blog.dotdotread.com/good-youth ；還有還有，現以港幣訂閱「點點閱」，他們便會用相同銀碼之台幣，捐款至財團法人賑災基金會成立賑濟的 #烏克蘭 專戶：https://blog.dotdotread.com/ukraine_donation 。
Comments